Diàlogu
Sardu Italianu
Giorgia: Duncas... abbaidende sa carta geogràfica, pro prima cosa, ite si podet iscrìere?
Laura: In antis de totu cales sunt sas làcanas!
Simona: A mie mi paret ca non b'at làcanas... est totu mare!
Giorgia: Tando si podet nàrrere ca sa regione est infusta a onni parte de su mare!
Laura: E lagos b'at? So abbaidende... non mi paret...
Giorgia: In custu situ est iscritu ca non b'at lagos naturales. Su lagu de Baratz ebbia, acanta a S'Alighera, no l'ant fatu sos òmines.
Simona: Tue a l'ischias? Ite si podet imparare istudiende!
Laura: E de sos rios chi colant in su territòriu, ite bos nde paret?
Giorgia: Prova a la fàghere prus manna...
Simona: Tzertu ca abbaidende gasi paret chi bi siat pagu abba...
Laura: Est beru! Però si abbàidas bene... mi paret chi a otzidente currant duos rios e mannos puru...
Giorgia: Eja, tenes resone!
Giorgia: Depet èssere pro custu chi cussa parte est prus birde... est totu una campeda!
Laura: Si podet nàrrere ca in sa regione nostra bi siat pròpiu ogni bene de Deus!
Simona: Fia abbaidende cales sunt sos montes prus artos... diant dèpere èssere sinnados de colore prus iscuru!
Laura: Sunt totus seddas e cùcuros bassos...
Giorgia: No, la' ca ses isballiende·ti! Inoghe in mesu b'at una pariga de montes prus iscuros!
Laura: Duncas podimus iscrìere ca sos montes current in mesu de su territòriu!
Giorgia: Mi paret chi sa chistione de comente est fata sa regione siat crara!
Laura: Iseta, semus ismentighende·nos de iscrìere in ue bivet sa gente... in ue s'agatant sas tzitades prus mannas?
Giorgia: ...Sa gente bivet acanta de mare e in sas bassuras! A parte de intro in sa regione bi bivet pagu gente, mancari bi siant biddigheddas meda.
Laura: Bene, si sa cosa est crarida... depimus fàghere sa segunda parte de s'istùdiu!
Simona: Ite narades si nos pasamus, como? Tèngio fintzas fàmene...