Diàlogu
Sardu Italianu
Marta: Ite est custu mùrigu? Bos intendo in coghina...
Giorgia: Daniele fiat mustrende·mi comente impreat s'ispatzulinu elètricu .
Marta: Bellu de a beru! Si ti praghet s'àtera borta chi mi càpitat ti nde còmporo unu.
Giorgia: Pro cumintzare tocat a comporare su dentifrìtziu comente su meu a Daniele!
Marta: Pro ite? Ispatzadu l'at su suo?
Giorgia: Ca nono... est ca si leat su meu ca li pigat sabore bellu...
Marta: A pustis lu chistiono deo. Tue ti l'as passadu su filu?
Giorgia: Eja, ufa... giai fatu.
Marta: Cun sas dentes non tocat a si brullare meda!
Giorgia: Apo cumprèndidu...
Marta: A ti lu regordas ite t'at naradu su dentista? No est tempus meda chi semus andadas...
Giorgia: Eja, giai mi lu regordo ite at naradu...
Mara: E assora chirca de pònnere mente a sos cussìgios suos.
Giorgia: Cussìgios, dotore e dolore puru m'ammento... e chie si lu podet ismentigare?
Marta: T'at naradu chi depes donare cara cun sos durches e depes issucare sas dentes ogni borta chi papas, a su mancu tres bortas a sa die!
Giorgia: Deo lu timo cussu òmine! Sa boghe in conca mi paret chi intendo... e cussu sonu de tràpanu!
Marta: E, immoe, nd'as a fàghere tue de isciringas...
Giorgia: Isceti su regordu de cussu fragu de meighina... mi pigat a gana mala!
Marta: Depes torrare a andare puru.
Giorgia: Ite est? E cando?
Marta: Pro fàghere sa bisita de controllu: depo mutire pro pigare s'apuntamentu.
Giorgia: Oh, ite bisu malu custu dentista!
Marta: Cras telèfono! Tantu b'est semper cussa àtera pitzoca in s'ambulatòriu...
Giorgia: Sa pitzoca chi traballat cun su dentista giai est brava e gentile.
Marta: Li narant “igienista” ca donat a cura chi buca e dentes siant lìmpios.
Giorgia: Issa giai l'ischit comente si pigat una pipia! Passèntzia bolet!
Marta: Passèntzia nde tenent totus... Toca ca intro deo a mi issucare.