Diàlogu
Sardu Italianu
Marta: Ti nde ses regordadu ca depimus essire custu sero?
Luigi: Essire? E a ue depimus andare? Sunt fintzas pro trasmìtere sa partida...
Marta: B'est sa chena cun sos sòtzios de s'azienda!
Luigi: Segura ses ca est oe? Deo mi dia corcare...
Marta: Segura so... e non ti penses chi sia pregiada deo puru...
Luigi: Mi nde fia ismentigadu... fia pro mi pònnere a abbaidare sa televisione!
Marta: Ite ratza de conca tenes... si non bi fia deo, inoghe...
Luigi: A ite ora est? In logu bellu la faghent custa borta?
Marta: Iseta ca chirco su billete in ue mi l'apo iscrita... li narant “Sos pratos de oro”.
Luigi: Giai su nùmene... totu custa cummèdia de gente chi papat paris e mancu si podet bìdere!
Marta: Como no la crescas... est ca in ristorante tocat a ischire comente si cumportare.
Luigi: Ma ti nde regordas s'àtera borta? Totu sas fròngias ca mancaiat una tassa!
Marta: Ahahah e su nàrrere ca sas tassas fiant tres!
Luigi: Ohi... s'amministradore non s'est tzitidu nudda...
Marta: Fiat totu unu bàntidu pro su binu chi aiat seberadu e pro s'organizatzione de cosa sua!
Luigi: E sa mugere? Est abarrada totu s'ora mutende su camerieri pro li pregontare ite bi fiat in sa cosa de papare...
Marta: Ahahahah! S'iscuru! Giai bi fiat un'ora isparitzende e torrende a batire sa cosa in coghina!
Luigi: Deo timo a andare in logos gasi... mi pigat s'afròddiu..
Marta: E ite manera! Pro ite? Est gente chi connosches...
Luigi: Est ca abarras in cue... timende de leare sa cosa dae su pradu cun sa furcheta curtza o cun sa longa!
Marta: Tue ammenta·ti ca sas posadas si manìgiant cumintzende dae foras!
Luigi: Giai l'isco! Ma non diat èssere istadu mègius a si papare una pizza cun sas manos?
Marta: At a èssere puru... como però depimus essire... e dae a cura a sas iscarpas!
Luigi: Giai mi paret de intèndere cussas cràstulas...
Marta: Lassa·las nàrrere... ca como bi penso deo a seberare su bestire!